امریکا کے تمام صدارتی امیدوار ایران مخالف: خامنہ ای

ایران کے سپریم لیڈر آیت اللہ علی خامنہ ای نے کہا ہے کہ امریکا کے تمام صدارتی اُمیدوار ایران مخالفت میں ایک دوسرے سے سبقت حاصل کرنے کی کوشش کررہے ہیں۔

خبر رساں ادارے رائٹرز کے مطابق ایرانی سال نو کے موقع پر ٹیلی ویژن خطاب میں آیت اللہ علی خامنہ ای کا کہنا تھا کہ امریکا کی پالیسی بڑی کمپنیوں کو ایران سے تجارت کرنے سے روک رہی ہے۔

ان کا کہنا تھا کہ امریکا



کے صدارتی اُمید وار اپنی تقاریر میں ایران کو بدنام کرنے کی کوشش کررہے ہیں، جو ان کی ایران مخالف ہونے کی نشانی ہے۔

خامنہ ای کا کہنا تھا کہ مغربی ممالک اور مقامات جو امریکا کے زیر اثر ہیں، ان کے ساتھ ایرانی بینکوں کو رقوم کی منتقلی میں مشکلات کا سامنا ہے۔

انھوں نے مزید کہا کہ امریکی اپنے کیے وعدے پورے نہیں کررہے ہیں اور صرف کاغذوں کی حد تک ہی پابندیاں اٹھائی گئی ہیں۔